УИХ-ын дарга М.Энхболд багш нарт мэндчилгээ дэвшүүлэв

2018 оны 01 сарын 24

Монгол Улсын Их Хурлын дарга М.Энхболд “Тогтвортой хөгжил – Ерөнхий боловсрол” сэдэвт багш нарын хоёрдугаар зөвлөгөөнд оролцогчдод хандан мэндчилгээ илгээсэн байна. Мэндчилгээг УИХ-ын даргын зөвлөх Б.Гүнбилэг уншиж танилцууллаа.

Мэндчилгээ

Эрхэм зочид оо!

Төлөөлөгчөөр оролцож буй Эрхэм хүндэт сурган хүмүүжүүлэгчид ээ!

Багш нарын хоёрдугаар зөвлөгөөнд оролцогч Эрхэм хүндэт багш, сурган хүмүүжүүлэгчид Та бүхэнд Монгол Улсын Их Хурлын нэрийн өмнөөс болон хувиасаа чин сэтгэлийн мэндчилгээг өргөн дэвшүүлье.

Дэлхий ертөнц урьд өмнө байгаагүйгээр харилцан хамааралтай болж буй өнөө цагт нийгмийн бүхий л салбарт өөрчлөлт гарч, “маргааш хэрэгтэй байгаа ур чадвар, чадамж”-ийг дэмждэг боловсролын шинэ хэлбэр, зохион байгуулалтыг Та биднээс нийгэм маань шаардаж байна. Дэлхий дахинаа сургалтын арга, агуулга, суралцах орчны хувьд огцом өөрчлөлтүүд ч явагдаж байна. Энэ өөрчлөлт шаардлагад Улсын маань боловсролын салбар шинэ байр суурь, хандлагаар хандах ёстой гэж үзэж байна. 

Хөгжлийн чиг хандлага, уламжлал шинэчлэлд тулгуурлан ерөнхий боловсролын салбарын өмнө тулгамдсан асуудлаа хэлэлцэж, харилцан ойлголцох, шийдэх арга замаа зөвлөлдөж нэгдсэн ойлголтод хүрэх нь чухал байна. Энэ ч утгаараа манай багш нар анхдугаар зөвлөгөөнөө хийснээс хойш 11 жилийн дараа дахин чуулж байна.

Боловсролоор дамжуулан бүтээлч, хариуцлага, ёс зүй, мэдлэг, чадвартай иргэн төлөвшүүлэх нь багш, сурган хүмүүжүүлэгч, эцэг эх, асран хамгаалагч Та бидний хамтын нэгдмэл үүрэг юм. Харин боловсролын салбарын хөрөнгө оруулалтыг нэмэгдүүлэх, хууль эрх зүйн орчныг боловсронгуй болгох, тэдгээрийн тогтвортой байдлыг хангах, бодлого, шийдвэрээ үр дүнтэй хэрэгжүүлэх нь төрийн үүрэг гэж үзэж байна.

Манай парламент боловсролын үйлчилгээний чанар, хүртээмж, тэгш хамран сургах, тэгш боломж олгох асуудалд онцгой анхаарал хандуулан ажиллаж байна. Үүний нэгэн жишээ нь Нийгмийн бодлого, боловсрол, шинжлэх ухааны Байнгын хорооноос 2017 онд сургуулийн өмнөх болон бага, дунд боловсрол, дээд боловсролын асуудлаар 4 тогтоол гаргаж хяналт тавин ажиллаж байна. Мөн Монгол Улсын 2018 оны төсвийн тухай хуулиар боловсролын салбарт 1.6 их наяд төгрөг буюу төсвийн зардлын 5 төгрөг тутмын нэг төгрөгийг зарцуулахаар баталлаа. Цаашид ч Улсын Их Хурлаас боловсролын салбарт оруулах хөрөнгө оруулалтын хэмжээг боломжит хэмжээгээр өсгөж, сургууль, цэцэрлэгийн хүртээмжийг нэмэгдүүлэх замаар сургалтын таатай орчныг бүрдүүлэхэд онцгой анхаарал хандуулах болно.

Боловсролын хөгжлийн чиг хандлага, сургууль, багшийн өмнө тулгамдсан зохицуулалт зайлшгүй шаардсан харилцаанд зохицуулалт хийх шаардлага ч байгаа.

Үүнийг Улсын Их Хурал анхааралтай авч үзэж шийдвэрлэх болно. Улсын Их Хурлын 2018 оны хаврын чуулганаар хэлэлцэх асуудлын жагсаалтад Боловсролын багц хуульд нэмэлт, өөрчлөлт оруулах хуулийн төслийн асуудлыг тусгаж батлахаар төлөвлөж байна. Ерөнхий боловсролын сургуулийн хэв шинж, бүтцийг эргэн харж, бага, дунд, ахлах сургуулийг бие даасан сонгодог агуулга бүтцээр хөгжүүлэх, ахлах сургуульд мэргэжлийн чиг баримжаа олгох үйлчилгээ нэвтрүүлэх, мэргэжлийн сэтгэл зүйч, эрүүл ахуйчийг орон тоогоор ажиллуулах, багш, ажилтны ёс зүйн хэм хэмжээ, код бий болгох, багшийн  ажлын туршлага, ур чадвар, ачаалалд суурилсан, ажлын үр дүн, бүтээмж, чанараар цалинждаг цалин хөлсний шударга, ил тод, нээлттэй, тогтолцоог бүрдүүлэх, сургалтын орчин нөхцөлийг сайжруулах, нэн ялангуяа хөдөөгийн сургуулиудыг шаардлага хангасан усан хангамж, ариун цэврийн байгууламжтай болгох зэрэг зохицуулалтыг Боловсролын тухай хуульд тусгах хэрэгцээ байна.

Боловсролын үйлчилгээний чанар, хүртээмж, сургалтын орчин, багш, ажилтны нэр хүнд, хөдөлмөрийн үнэлэмж, нийгмийн баталгаа зэрэг өргөн хүрээг хамарсан боловсролын хөгжлийн бодлого, зохицуулалтыг боловсронгуй болгох асуудлыг бодлого, шийдвэр, төсөв, санхүү, хууль эрх зүйн хүрээнд тасралтгүй дэмжин ажиллах нь Улсын Их Хурлын чухал үүрэг байх болно.

Өнөөдөр үйл ажиллагаагаа эхэлж байгаа багш нарын хоёрдугаар зөвлөгөөн боловсролын эрх зүйн орчныг сайжруулах, багшийн хөгжил, мэргэжлийн ёс зүй, нийгмийн баталгаа, сургалтын чанар, үнэлгээ, хүүхдийн хөгжил, хамгаалал, хүмүүжил, төлөвшил зэрэг олон асуудалд онцгой анхаарал хандуулж оновчтой шийдэлд хүрнэ гэдэгт найдаж байна.

Монгол түмнийхээ үр хүүхэд, өсвөр үеийг сурган хүмүүжүүлэх их үйлс тань өнө мөнхөд, өөдрөг гэгээн байхын ерөөлийг дэвшүүлж, зөвлөгөөний үйл ажиллагаанд амжилт хүсье.

Эрдэм ухаан түгэн дэлгэрч, Эх орон маань хөгжин дэгжих болтугай!

Анхаарал тавьсанд баярлалаа.

2018 оны 01 дүгээр сарын 24-ний өдөр. Улаанбаатар хот.

 

 

 


Ирсэн саналууд
Д.Гэрэлцогт:

Анги засварыг,засварын мөнгийг нэг мөр шийдмээр юм.


2018 оны 06 сарын 14
Д.Гэрэлцогт:

2.Сурагчийн дүрэмт хувцсыг өвөл,зуных гээд нормын хувцас шиг үнэгүй тарааж өгвөл зүгээр байна.Улс даяар ижил.3.Багш нарыг дэндүү тайлангаар дарах юм.Бичиг цаасанд дарагдаж байна.


2018 оны 06 сарын 14
Д:Гэрэлцогт :

1.Сургалтын хөтөлбөрийг өөрчлөхөөсөө өмнө сурах бичгээ хэлээд гар дээр ирүүлчихээд тэр хөтөлбөрөө мөрдвөл зүгээр юм.


2018 оны 06 сарын 14
Д:Гэрэлцогт :

Дээрээс төрөл бүрийн уралдаан тэмцээн,олимпиад дэндүү их зохиогдож байна.Ангийнхаа хүүхдүүдийг хүмүүжүүлэх,хөгжүүлэх ,тэдний хүсэл сонирхолд нийцсэн төлөвлөгөө гаргаад түүнийхээ дагуу явж байтал гэнэт дээрээс уралдаан тэмцээн гараад ирнэ .Ангийн ажлын төлөвлөгөө ямарч хэрэггүй болж байна.


2018 оны 06 сарын 14
Н.Отгонцэцэг:

авьяасыг дэмжсэн дуу шүлэг бүжгийн уралдаан, спортын тэмцээн хэт их болж, хүүхдийн сурлага мэдлэг чадварыг хөгжүүлэх үйл ажиллагаа, хүмүүжил төлөвшилтэй холбоотой ажлууд бага явагдаж байна. Энэ тал дээр цаашид анхаарах. мөн багшийн бичиг цаасны ажил, янз бүрийн тайлангууд ихдэж сурагчидтайгаа ажиллах цаг багадаж байна.


2018 оны 06 сарын 09
О.Бат-Эрдэнэ:

анги удирдсан багшийн ажлын ачаалал дэндүү их бүх сургууль дээр ирсэн бичиг ажилууд АУБ дээр ирж бөөгнөрдөг энэ нь багшийн аяааллыг дэндүү нэмдэг


2018 оны 05 сарын 16
О.Бат-Эрдэнэ:

багш сурагчийн бодит ачааллыг тооцож үздэггүй хүн бүр ажил явуулах гэж төрөл бүрийн хугацаат ажлаар байнга дардаг, заримдаа үндсэн ажлаа марттал дээрээс ирсэн бичгийн хариу тайлан судалгааг хийдэг. энэ нь багш сурагчийн үндсэн зорилго хазайхад хүрч байна .


2018 оны 05 сарын 16
О.Бат-Эрдэнэ:

математикийн сурах бичгийн агуулга алдагдсан. хэтэрхий тархай бутархай олон сэдвийг самардсан байгаа нь сурагчдыг цэгцтэй мэдлэг олоход бэрхшээлтэй байна агуулга өргөн нэг сэдэвт оногдох заах цаг бага байна


2018 оны 05 сарын 16
Мөнхгэрэл:

Илүү цагаар маш их ажилладаг гэвч ямарч илүү цагийн мөнгө байдаггүй. Дээрээс нь багш нар тэр дундаа дунд ангийн багш нар сургалтын хэрэглэгдэхүүн бэлтгэхдээ бүх зардалыг өөрөөсөө гаргадаг. Принтер хүртэл цэнэглэх хороо өөрөөсөө гаргаж байна. Багш нар чинь цалингаас цалингийн хооронд биш өрнөөс өрний хооронд л амьдарч байна!!! ЯДРУУХАН Л АМЬДАРЧ БАЙНА ДАА БАГШ НАР ЧИНЬ


2018 оны 04 сарын 29
МТ багш:

Яг үнэн. Хөдөлмөрийн хортой, халуун, хүнд, онцгой нөхцөлд хамаарах ажил, мэргэжлийн жагсаалтанд мэдээллийн технологийн багш ормоор юм. Шинжээч эмч, шүүх эмнэлэг болон шинжилгээний лабораторийн шинжээч, бага эмч, эхо-рентген эмч, лаборант, өнгөт гэрэл зураг, дүрс бичлэгийн лабораторийн эрхлэгч....гм онцгой нөхцлийн нэмэгдлийг авдаг байх шүү.


2018 оны 04 сарын 29